വലയസൂര്യഗ്രഹണം

ശാസ്ത്രസാഹിത്യപരിഷത്ത് ആലുവ യൂണിറ്റിൻ്റെയും യു സി കോളേജ് ഫിസിക്സ് ഡിപ്പാർട്ട്മെൻ്റിൻ്റെയും ഫ്രീതിങ്കേഴ്സ് ക്ലബ് യുസിസിയുടെയും സംയുക്ത ആഭിമുഖ്യത്തിൽ ഇന്ന് കോളേജിൽ വെച്ച് ഇന്ന് കോളേജിൽ വെച്ച് നടത്തിയ വലയ സൂര്യഗ്രഹണ നിരീക്ഷണം വേറിട്ട അനുഭവമായിരുന്നു.

ശാസ്ത്രത്തിൻ്റെ നിരീക്ഷണത്തിനും നിർവചനത്തിനു പൂർണമായും വഴങ്ങുന്ന അനേകം പ്രപഞ്ച പ്രതിഭാസങ്ങളിൽ ഒന്നാണ്  സൂര്യഗ്രഹണം. ഈ പ്രതിഭാസത്തെ ചുറ്റിപ്പറ്റി ശാസ്ത്രം ഒട്ടും തന്നെ പുരോഗമിച്ചിട്ടില്ലാത്ത ഗോത്ര കാലഘട്ടം മുതലേതന്നെ നിലനിൽക്കുന്ന അനേകം അന്ധവിശ്വാസങ്ങളും മിഥ്യാ ബോധ്യങ്ങളും കപട ധാരണകളും നമ്മുടെ സമൂഹത്തിലും  സമൂഹത്തെ നിയന്ത്രിക്കുന്ന  മതങ്ങളിലും ഉണ്ട്.
ഇത്തരം അന്ധവിശ്വാസങ്ങളെ ഏതു രീതിയിൽ ചെറുക്കാമെന്നും  സമൂഹത്തിനു മുന്നിൽ അവയുടെ കാപട്യം എത്തരത്തിൽ തുറന്നുകാട്ടാമെന്നും വ്യക്തമാക്കുന്നതായിരുന്നു ഇന്നത്തെ പരിപാടികൾ.

ഗ്രഹണത്തിൻ്റെ പരിപൂർണതയിൽ  നടത്തിയ മധുര വിതരണവും പരിചയസമ്പന്നരായ അധ്യാപകരുടെ  നിർദ്ദേശങ്ങളും സൗഹൃദ സംഭാഷണങ്ങളും ശാസ്ത്ര പ്രചാരണത്തിൻ്റെ വേറിട്ട മാനങ്ങൾ പരിചയപ്പെടുത്തുന്നവയായിരുന്നു.


ശാസ്ത്രബോധം  ഭരണകൂടം തന്നെ നേരിട്ട്  ഇടപെട്ട്  നശിപ്പിക്കുന്ന സത്യാനന്തര കാലഘട്ടത്തിൽ ഇത്തരത്തിലുള്ള ചെറിയ പരിപാടികളിലൂടെയാണ് പ്രതിരോധത്തിൻ്റെ രാഷ്ട്രീയം മുന്നേറുന്നത്. ചാണകത്തിലെ പ്ലൂട്ടോണിയവും മന്ത്രത്തിൻ്റെ തരംഗ ശക്തിയും അന്വേഷിക്കുന്ന ശാസ്ത്രാനന്തര  ഗവേഷണങ്ങൾ പെരുകുന്ന ഈ കാലത്ത് ഇത്തരത്തിലുള്ള ചെറിയ മുന്നേറ്റങ്ങൾക്കാണ് ആശ്വാസകരമായ ഭാവിയെക്കുറിച്ചുള്ള പ്രതീക്ഷകൾ നൽകാനാവുന്നത്.

വിദ്യാർത്ഥികളുടെ പങ്കാളിത്തത്തേക്കാളേറെ   വളരെയേറെ സന്തോഷം നൽകിയത്  അധ്യാപകരുടെ വലിയ പിന്തുണയാണ്. അതിലേറെ ആഹ്ലാദം തന്നത് സൗരക്കണ്ണട യിലൂടെയും പിൻഹോൾ ബോക്സിലൂടെ യും ഗ്രഹണം കണ്ട ആഹ്ളാദത്തിലും കൗതുകത്തിലും പൊട്ടിച്ചിരിക്കുന്ന കൊച്ചുകുട്ടികളുടെ മുഖമാണ്.

ഗ്രഹണത്തെ പേടിച്ച് നടയടച്ച് അകത്തിരുന്ന  സർവ്വശക്തന്മാരും ശക്തകളുമല്ല പ്രപഞ്ച പ്രതിഭാസത്തിൻ്റെ കൗതുകം അറിയാൻ എത്തിച്ചേർന്ന  കുരുന്നുകളിലാണ് പ്രതീക്ഷ...

ഫ്രീ തിങ്കേഴ്സ് ക്ലബ് യു സി സി യുടെ ഓഫീഷ്യൽ ഫേസ്ബുക്ക് പോസ്റ്റ് പോസ്റ്റ് കാണാൻ ഇവിടെ ക്ലിക്ക് ചെയ്യുക